Малывыстың харааданчыын!
Бурун шагда тыва кижи
Ёзу-чурум сагыыр чораан
Бо-ла өйде чуртувуста
Ёзулалдар өскээр барган
Шынап дээштиң алыр болза
Куда-дойга чаңгыс хойну
Дөгергештиң ужа-төжүн
Келген чонга үлей салыр
Бир-ле черге куда боор дээн
15 ужа херек дээн-дир!
Кайыын ынча хөйнү алыр
Кудазы-даа бергедешкен!
Дөргүл-төрел эмеглежип
Дөгерезин дилеп тыпкаш
15 хойну оочурлааштың
Өзей бээрге коргунчуг-даа
Кызып чорааш ужаларны
Кудаларга сөңнеп сунган
Күжүр куда тоор дээр сен бе
Хүлээп алгаш, ону чивээн
Ынчанмайн канчаар дээр сен
Изиг чайын ырак черден
Камнап, соодуп чорда безин
Көгергилеп, каксый берген
Ужур ындыг чүве дээнней
Ужалар бээр кудаларга
Улаштыр-ла ыт-кушка
Ужаларны өргүй кааптар
Дорту-биле сөглээр болза
15 хойну ытка бээр дээш
Дилеп, колдап дөгерген бе?
Өршээ, өршээ, оран-таңдым!
Балдырывыс дыңзыг эвес
Байыыргаарга эпчок-ла-дыр
Кажан черле орталанып
Хамык ужур сагыттынар?
Уштап-баштаар черлер-биле
Демнежипкеш аргазын тып
Улус-чонну эде сургап
Тайылбырны кылза чүүлдүг
Өгленишкен аныяктар
15 хойну алган болза
Малывыс ам улам өзүп
Мандып, өзүп турбас деп бе?
Тыва чонум, боданыңар!
Куда-дойга чаңгыс хойну
Өкпелевейн, үлежип чиил
Оон хөй хойнуң тынын үспээл
Саая Айлазия. 14.04.2018.